Willemstad – Riba djarason 30 di mart, tabata Minister Charles Cooper su di tres dia di trabou na Hulanda. E dia aki e la bishitá e parti di e ekshibishon di InterTraffic relashoná ku tereno di parkéo i stashonamentu di vehíkulo. Esaki tantu pa den siudat komo riba òf den un lugá di stashonamentu.
Manera ta konosí, resiéntemente Ministerio di Tráfiko, Transporte i Planifikashon Urbano a kaba di tene un destáho pùbliko pa por a yega na un kompanía ku lo mester introdusí un sistema nobo di kòntròl di parkéo den nos sentro di siudat. Un di Gobièrnu su eksigensianan pa esaki ta pa bini ku un sistema super modèrno i efisiente di kontròl di parkéo, kontribuyendo asina na e desaroyo pa nos por logra yega na e asina yamá “Smart City” pa Kòrsou.
Tambe Minister Cooper i su delegashon a bishitá e área di e Expo kaminda tabatin diferente kompanianan spesialisá den seguridat den tráfiko. Einan por a tuma nota di desaroyonan interesante ku lo por ser implementá serka nos na Kòrsou tambe.
Mas despues Minister Cooper a hasi un bishita na e kompanía MBS Vianen , ku ta un kompania speshalisá den tur konstrukshonnan prefab di beton, pa asina pone su mes na altúra di tur lokual e kompania aki lo por tin di ofresè na Kòrsou. Esaki ta un kompanía ku tin hopi interés di bin establesé su mes na nos dushi Isla Kòrsou.
Di e manera aki, a kùlmina un dia mas di trabou di Minister Cooper ku ta sigui traha pa hiba Kòrsou dilanti.